O Vicepresidente da Fundación Compostela Deporte e Concelleiro de Deportes de Santiago, Bernardino Rama, e o Xerente de Área Central e membro do Padroado da Fundación Compostela Deporte Xoán Carlos Losada, presentaron esta mañá as Axudas para os clubes federados composteláns 2010. Un programa co que a Fundación propón ferramentas de apoio económico e de xestión ás entidades deportivas da cidade. A Quinta edición desta convocatoria conta cunha dotación orzamentaria total de 65.000 euros, e que presenta como principal novidade a respecto doutros anos a creación dunha asesoría permanente en materia laboral, fiscal e contábel así como para a tramitación das subvencións con outras entidades públicas e privadas.. As bases para optar a este programa do Plano de Fomento da práctica deportiva da entidade están dispoñibles no portal de Internet www.fundacioncompostela.orgO Vicepresidente da Fundación Compostela Deporte, Bernardino Rama sinalou que o Concello de Santiago de Compostela, a través do seu Departamento de Deportes, como membro do Padroado da Fundación Compostela Deporte, ten dentro dos seus cometidos definir a Política Deportiva da cidade e realizar programas que favorezan o desenvolvemento e promoción do deporte; e dentro deste cometido están inseridas as subvencións da Fundación Compostela para as entidades deportivas de Santiago de Compostela.

Bernardino Rama fixo fincapé na nova modalidade que se inclúe nas Axudas deste ano da Fundación. “O asesoramento aos clubes para a presentación de subvencións ten como finalidade evitar a parálise na tramitacións de subvencións, xa que hai xente que perde subvencións por non presentalas adecuadamente”.

O Xerente de Área Central, Xoán Carlos Losada tamén sinalou a repecto da nova modalidade de Axuda para a Xestión das entidades deportivas que a Fundación vai por en marcha con esta convocatoria de Axudas, que “cando o proxecto da fundación nace sabíamos que un obxectivo era a mellora da xestión das entidades deportivas, e sabíamos que era unha carencia , xa que estas ás veces non teñen un departamento admistrativo. A mellora da xestión da xestión dos clubes é un dos obxectivos fundacionais”.

No acto finalmente interviu Nuria Palmero da empresa Xestión Social que vai ser a que preste o servizo de asesoramento tanto on-line, como presencial na sede da Fundación, para axudar ás entidades deportivas na súa xestión nos ámbitos, fiscal, laboral e contábel, así como na tramitación das subvencións perante as distintas administracións públicas. Esta sinalou que a día de hoxe a normativa legal vén provocando maior concreción na xestión das subvencións. Así mesmo contatou que ” en materia fiscal os clubes teñen determinadas dificultades. Vemos pola nosa experiência unha carencia de formación na materia”. Así mesmo, parabenizou á Fundación por esta iniciativa.
Nuria Palmero tamén informou que desde a Fundación se lles fará chegar a todos os clubes información de todas as convocatórias de subvencións e modificacións en materia legal que poidan ser do seu interese.
No que atinxe o outro apartado da convocatoria de Axudas todos aqueles clubes federados de Santiago de Compostela, que soliciten a subvención da Fundación Compostela Deporte percibirán 10 Euros por cada licenza que teñan.

Finalmente o Vicepresidente da Fundación informou que por parte da Fundación e do Concello se dará a coñecer o diñeiro que se puxo ao dispor dos clubes durante o ano 2009. Isto sen ter presente que no Concello de Santiago de Compostela, ao deporte federado non se lle cobra o uso das instalacións. Este é totalmente gratuito.

Ás Axudas da Fundación poderán optar todos os clubes federados que desenvolvan a súa actividade deportiva no Concello de Santiago. As entidades deportivas interesadas poden consultar desde xa as bases das Axudas no portal de Internet da entidade www.fundacioncompostela.org.

As solicitudes formalizaranse mediante instancia dirixida á Fundación Compostela Deporte (Estadio de San Lázaro, Porta 16). O prazo de solicitude remata o vindeiro día 29 de xaneiro de 2010.

Aquí tes as bases, a solicitude e a ficha do deportista.

Esta entrada publicouse , o Martes, 22 de Decembro de 2009 ás 18:27 e está gardada baixo Axudas, General. Podes seguir calquera resposta a entrada mediante a semente RSS 2.0. Están pechados tanto os comentarios coma os pings.