A Fundación Compostela Deporte deu a coñecer os clubes que optan a ser galardoados cos premios PIDEVI.
10 de Marzo de 2010
O Vicepresidente da Fundación Compostela Deporte e Concelleiro de Deportes de Santiago, Bernardino Rama, e o Xerente de Área Central e membro do Padroado da Fundación Compostela Deporte Xoán Carlos Losada e o membro do Comité de Selección Antonio Bermúdez presentaron esta mañá a V Gala do Deporte Compostelán que terá lugar o vindeiro venres días 26 de marzo no Hotel Puerta del Camino. Neste acto entregaranse as Axudas aos Clubes Federados de Santiago de Compostela e os Premios Deporte e Vida nas Categoría de Saúde, Educación, Benestar e Non Violencia, así como o Premio Especial Deporte e Vida e os trofeos solidarios.
O Vicepresidente da Fundación Compostela Deporte, Bernardino Rama explicou o programa para o día 26 de marzo, no que ás 20′30h se fará entrega das Axudas aos clubes Deportivos Federados de Santiago de Compostela e despois terá lugar a Gala do Deporte Compostelán no que se darán a coñecer os galardoados cos premios PIDEVI. Segundo sinalou este, “a Gala do Deporte Compostelán é un acto de convivencia de todo o deporte compostelán”.
Pola súa parte Antonio Bermúdez, membro do Comité de Selección dos Premios PIDEVI deu a coñecer os doce clubes seleccionados entre os que sairán os gañadores nos apartados de Educación, Saúde, Benestar e Non-Violencia que percibirán un premio de 2.000 €. Estes son:
Arteal Tenis de Mesa
Asociación ASPAS
Bertamiráns FC
CD Belvís
CD Conxo
Club Hockey Compostela
Club Olímpico de Vedra
Club San Francisco de Teo
E.D. Xuventude Oroso
Hockey Club Raxoi
S.D. A Gaiola
Xacobeo 2010 Lobelle de Santiago FS
Os clubes seleccionados que non sexan agraciados con ningún premio percibirán 500€. Así mesmo, tamén se dará a coñecer o PREMIO ESPECIAL DEPORTE e VIDA de 3.000€ para o club seleccionado que sexa merecedor de tal distinción pola súa labor na execución conxunta dos catro programas anteditos.
Finalmente entregaranse os Trofeos Solidarios que como sinalou Antonio Bermúdez son “premios de prestixio sen ningunha dotación económica”. Estes son os Trofeo á EMPRESA SOLIDARIA que se distinga no apoio ao deporte a través da súa responsabilidade social corporativa e á ORGANIZACIÓN/ ASOCIACIÓN SOLIDARIA que se distinga no apoio ao mesmo.
Antonio Bermúdez explicou o procedemento que seguiu o comité de Selección para escoller estes doce clubes. Primeiro houbo unha primeira criba de todas as solicitudes presentadas, e despois unha vez que os clubes preseleccionados achegaron memorias e todo tipo de documentación para probar os seus méritos, seleccionáronse a estes doce clubes. Ademais, sinalou que antes das dúas reunións os membros do comité valoraron individualmente cada un dos expedientes das entidades solicitantes e despois na propia reunión fixose a escolla. Así mesmo, “aínda non están decidos os galardoados en cada unha das categorías, aínda está por decidir o gañador absoluto. Iso está pendente dunha xuntanza do Comité de selección. O mesmo acontece no caso dos Trofeos EMPRESA SOLIDARIA e ORGANIZACIÓN/ASOCIACIÓN SOLIDARIA.
Poa súa parte o membro do Padroado e Xerente de Área Central Juan Carlos Losada sinalou que a Gala do Deporte Compostelán é un evento gañado nos últimos anos e que esta é a súa V Edición. Quixo resaltar a importancia de podela manter “a pesar de todo o que está chovendo no ámbito económico” Salientou o compromiso das empresas membros do Padroado e colaboradoras coa Fundación, para poder manter a Gala do Deporte Compostelán, as Axudas e os Premios PIDEVI.
